獨腳俠變獨眼俠（上）

2012年7月23日，終於踏上南美之途。

用得終於這二字，就代表出發前一波三折。無錯，我在出發前三日，才拆掉右眼眼皮上的線。當然啦，小妹不是為了貪靚去做割眼皮手術(就算做都唔會只做右眼吧？！) ，實情是眼窩的骨頭上生了個小瘤，需要切下來再作化驗。提及此事，不是想炫耀自己有幾堅有幾威，只是求醫的過程正正影響到旅程計劃，而且整件事都幾搞笑，所以特別加入這小插曲。

有病先定有旅行計劃先，就好像向西哥的名句「 究竟有雞欄先，有雞煲先，還是有嫖客先」一樣咁耐人尋味。如果不是想在旅行前驗身，就不會發現身體有問題；但如果唔係得知有可能生惡性腫瘤而驚覺要活在當下，我想，我亦未必這般果斷地決定暴走南美178天。

言歸正傳。

我問醫生腫瘤是惡性的機會有多大。

醫生說：「一日沒化驗都很難有定論。好大機會係良性，但都有可能係惡性。」嘩！這比股評人日日講嘅股票價格可升可跌更無棱兩可！

那麽醫生，請問手術傷口會有多大？

醫生想了想：「大概2-3cm左右吧! 」

2cm 同3cm足足差了50%，而且，3cm咪仲長過我隻眼？！

「手術難度大嗎？有什麼downside risks?」我問到這裡時已經有點口震震。

「如果你的腫瘤和眼窩骨黏得很實就會很難切除，在那種情況下，我只好縫合傷口了事。當然啦，縫傷口也很講究技巧，接口縫得唔靚，右眼有機會唔可以完全合上。」

我沒有再追問醫生我死唔眼閉的機會有幾大，因為，我在心中，已經100% certified 了這位醫生。大佬，家下以為是中學生上縫紉課縫完又拆拆完又縫唔滿意再搵阿媽替槍啊？！心裏一輪的xyz，表面上還是禮貌地跟醫生道別。關上門前，醫生還很體貼地說，如果割不開那顆腫瘤，手術費可以打折。多謝啦醫生，就算你送錢俾我都唔會搵你。